1334-01-24 |

Arch St Bavo Haarlem

Haarlem Algemeen

alle diegenen etc make ic Beatrijs Jans wijf veren Baertenzoon cont ende kenlic, dat ic by consent ende wille myns lyfs ghesellen Jans voern, oerdeniert hebbe ende oerdeniere van der capelrie, die ic bij consente Jans voers. ende bi sinnen toedoen in die kerke te Haerlem gesed hebb. Welke cappelrie Jan voers. mijn gheselle ende ic bi sinen wille mit deser tyd ghegheven hebben Hughe den Muus minen neve, dat die ghifte ende die presentatie na deser eerste gifte die Jan ende ic nu ghedaen hebben, comen sal na onser twier doet op den deken van onser Vrouwen ghilder der papenghilde te Haerlem, ende op den capellanen die dan hebben sellen veren Baerten cappelrie ende Jans mijns ghesellen voorsproken behouden dien Jan ende nu ende elken van onsen beyden die ghifte also langhe als wi of enich van ons levende blyft. In oerconde deser dinc so hebbe ic Janne voorn. mynen man ghebeden dat hi desen brief bisegelen wille voer ons beyden. Ende hebben beyde ghebeden haren Janne van Petten, provisor en deken van Kermerlant, haren Gherrijt Dullaerd, haren Jacob van Westzaenden, dat si desen brief mede willen bezeghelen. Ende wi Jan Dullaerd, Jan van Petten, Gheryt ende Jacob, priesters voors om beden willen Beatrys ende Jans hebben desen brief mede bezegeld met onsen zegelen. Gegeven int jaer 1334 op St Pouwelsavond [1334-01-24]. Copie 1345-03-31 (vgl 1325-03-12, 1373)