1474 (3) |

Arch Abdij Egmond Vroonboek Vroonlanden bij Limmen fol 44v

Jaartallenindex

(vervolg) Item opten anderen dach in Januario anno LXXIV heeft Pieter Luijtgesz als voecht van sijn wijf Aef geloeft syn vroenlant te vercoepen dat hij myt syn wijf genoemen heeft, binnen sjaers. Des soe sal hij t Alcmer wonen moegen 1 jaer lanc. Item Rem Michielsz, Dirc Jan Voppenz ende Dirc Danielsz hebben een sceidinghe utgesproken tusschen Jan van Langen ende mij etc. Item anno LXXIV hebben Rem Michielsz ende Pieter Jan Teeten een da..gin (?) gemaeckt tusschen my ende Claes Jan Teeten ouder soen te weten dat Claes voers. verlof hebben sel buten te woenen ende sijn lant te vercopen en binnen dese tyt ende omn. Sanct, of dat lant bewonen binnen dese tyt voirs. Item Transl. Martini heeft Jan van Berkenroed tegens mijn here gedadinct van die verboernisse van Scapenven te weten dat Jan voirs dat vroen hebben sel 4 jaeren lanc ende Rem Michielsz sel voer Jan in dat boeck staen, ende binnen die 4 jaren soe sel Jan dit lant vercopen of myn here sijn moede hebben. Ende mijn here seide Jan soude daer gheen cost of hebben maer hij soude comen ende kennen dat die jaren om waren ende laten die voerwaerden vervullen