1505-01-03 |

G.A. Monnikendam Inv 154 fol 82/Galileaconvent Monnikendam

Jaartallenindex

ic Meynart Willemsz, baliuwe van Waterlant doe kundich etc dat ic verstaen hebbe dat Claes Lambertsz van Monikedam, van syns moeders wegen, Gheertruut Lambertswedue den broeders van Galileen hevet doen daghen dat jaer voerleden te Monikedam voer dat rechte boven dat compulsorium hem ghedaen hebben die heren in den Haeghe overmits doerwaerder die dat compulsorium ghekundicht ende voerlesen hevet scout ende scepenen, waeromme dat ic Meynaert Willemsz bailiuwe voers. verbiede Claes Lambertsz van synre moeder of yemant van horentweghen opten pene van 100 ducaten te verbueren teghen mijn ghenadighen heer, dat hi sel den broeders voirs onghemoeijt laten mit enighen aenspreken ende rechte te Monikendam, want si staen onder rechte van den heren in den Haghe. Voert aen soe verbiede ic ju baliuwe voirs scout, scepenen ende sevenen opten voirs pene gheen recht te doen te Monikendam van den placke voers ter tyt toe dat die sententie van den heren in den Haghe van die processi ghegheven is