1472 (3) |

Arch Abdij Egmond Vroonboek Vroonlanden bij Limmen fol 35v-38

Jaartallenindex

(vervolg) op St Mathysdach Apostel soe sijn voir mij gecoemen Dirc Jan Teeten ende sijn broeder Jacop Jan Teeten ende hebben mij gebeden dat ic in myn Vroenboeck scriven woude een utspraeck die sij beiden williken gebleven waren an Pieter Jan Teeten, jonge Claes Jan Teeten, sijn broeder, Jan Reynersz ende Claes comen Jans ende deden een hantastinge an mijn hant als meijer ende rechter van dat Vroenlant, ende geloefden die utspraeck te houden ende te voldoen in manieren heirnae geschreven: Dirc sel van Jacop hebben voer een somma van penn. die Jacop Dirc sculdich was van die coep van Jan Claesz van der Marsck al dat Vroenlant dat daer leijt after dat huijs, als dat beheijnt ende bedolven is. Ende daertoe een notwech van een roede breeet, an die noertzide van Jacops zeedlant, van die wech westwert tot die weiden voirs. sijn vrie wille mede te doen. Ende daertoe sel Dirc hebben omtrent 1 want zeedlants bioesten an die Lijdwech oestwert op an den sloet van den omganc geliken breet als Griet Matijs Claesz wedu lant breet is, ende dit land sel Dirc terstont mogen anvaten als hij dat vint, ende daer is opgeset van Vroenhuyr 3sc 2d die ganc etc. Item soe sel Jacop hebben al dat Vroenland van Jan Claesz van der Marsck te weten ± 6 want bioesten, bi zuyden ende bij noerden dat huys ende daer is op geset 9 d die ganc 1 g 1h van Vroenhuyr, ende hiermede sellen sij gesceiden wesen van alle geschelen ende onrust, die sij tot deser dage toe gehat mogen hebben, sonder daer tegens te seggen