1446-01-02 |

Register Criminele Sententiën Gerecht Haarlem p 24 no 88

Haarlem Algemeen

alsoe Jacop Coster, na den tuijch die t gerecht daeroff gehoord hebben, den kircmeesters onredelicke, dreijgelicke woirde gegeven heeft, doe dat fundament van den nuwen werck aan de noortzijde van der kirken gedolven wort, en omdat dieselve Jacop oic sake gehantiert heeft daer grote ongenoechte binnen der stede off gecomen mochte hebben, ende oic omdat hij zyn wyff groet ontier ende vrese van horen lyve gedaen heeft, ende omdat hy synen broider dreijgelike woorden gegeven heeft, ende alsoe hij van deser misdaden die sake gebleven is an den gerecht, soe seit hem t gerecht over dat hy der stede ter betering daeroff doen sal ende geven 40000 steens ende 20 hoet calcx, ende die zal hij verbrgen (!) an s gerechts handen tusschen dit ende den heiligen Dertiendage. Ende waert dat hij des niet en dede, soe banden t gerecht na den heiligen Dertien terstont uter stede, uut der baljuscip van Kenemerland ende van Rynlant ende niet weder in te comen tenzij dat hij den steen en kalc verborgt heeft ende die sal hij doen leveren en brengen op synen cost binnen der stede by der Zylpoirten ende daer en tenden nochtant binnen der stede niet te comen tenzij bij wille van den gemenen gerecht