1500~ (6) |

G.A. Monnikendam Inv 154 fol 88-93v/Diversorium Galileaconvent

Jaartallenindex

Dit Sijn Die Goeghen Van Monikebroek: item tuscken die straet ende die goegbregghe mit weghe, daer staen 2 palen ende daer sijn 4 rood goegs van 4 deympt lants ghehieten Lamptgeslant dat is 56 voet goegs. Mer sommighe willen segghen dattet ons niet toebehoert, want het heeft sijn dijck op die oude sluus mit noch twee husen daer an die betimmert sijn. Item een weijnich van die brugghe te gaen daer hebben wij gheslaghen een pael ant noert neffens Claes Fellen rijelant, daer leit die goeg van die acker, 1½ rood ende staet een weijnich van die eerste crom van Monikedam ende suijdwart dairan comt Reijer Aemsz goeg, die quade goeg op die waterslach. Item mids tuscken die eerste crom van t bregghtgen of daer leyt die goeg van Gelresse ven 4 deijmpt, dat deympt anderhalve roode. Summa 6 rood 84 voet, ende strect noortwart bi nae an die ander crom van die goeghe breg, ende suijteyndt te sien neffens dat derde huus van die Sacksteghe ende eijndet noertwert an mits an die anderde crom neffen die sloot van dat naeste lant an die brug daer een pael staet. Item een weijnich westwart daer of leyt een quade goeg ende is ghestoelt op een lant ende hiet dat Mollelant ende heeft een man van Amsterdam vercoft Gheryt Semmesoen. Daer syn wi gheen sever (?) of ende daer legghen voer ons Floertgen meester Dircs, Aechtgen Reijnis, Nies Jan Jaeps, Aeftgen Reijnis, an t ander syd oec Floertgen uts, Jaep Cleesen, Aechte Gelkisdochter. Item daer an van Mollers dyccampsgoeg onse deympt 33 voet ende legghet recht neffen die sudeijnder mollen te sien van Monikedam oestwart op te sien na die scoel ende strecket noert op ende legghet tusken die vierde ende vyffte crom ende eyndet recht te sien op die scoel te Monikedam