1333< |

Cartul St Jan Haarlem no 864

Haarlem Algemeen

broeder Mertijn wit dat wij u zenden bi den bisschop van Zuden enen brief dien wij hadden van onsen heere van Utrecht, als ter Vrouwen behoef uter Wijc ende der joncfrouwen van Berghen, dat sij ende hoere ghesinde in onse goidshuse misse horen mogen ende ons heren lichame ontfaen buten der prochipapen verlof, behoudelic der moeder kerke hoers rechts, dat is hoere rechte offerhande ten groten hoechtijden. Voort so spreket onser nichten en als van dien ghelde dat si belegghen wil als ghi ons ghescreven hadt, wil si hebben op 10£ één £ sjaers renten alzo langhe als si levet dat gheve wij haer gaerne, ende na hoerre doot te bliven tot ere cappelrien in onsen Godshuyse enelike eenen priester daer op te houden voer hoere ziele. Ende wil si dat doen omme om 1£ 1 pont renten, om 100£ 10£ renten sjaars, so laet u dat ghelt gheven ende comter mede tot ons t Utrecht, so gheven wi haer weder onse brieve op die rente sprekende. Ende hier so moghe di broeder Dideric bi nemen duncket u goet dat hijt haer mede ondersegghe. God sie met u. Ghegeven t Utrecht [zonder jaar] [NB Aleid uter Wyc, 1320-1333, dochter van heer Willem van Brederode]