1398-12-28 |

R.A.H. Coll Aanw 67 fol 60v/Mem B.M fol 45

Haarlem Algemeen

item nam Heijn Zagher bi sinen eede, doe t vechtelic was tot Haerlem op Willem Cuser in Jans huijs van Foreest, doe was Heijn voers. Willems knecht, doe in dien vechtelic en sach Heijn voers. noch en hoorde dat Willem die Grebber yet dede of pijnde te doen, dat Willem Cuser tiegens dragen mochte, maer hi sach dat Willem die Grebber him seer pijnde te scheijden, ende als him docht so was him leet toten vechtelic. Oec so seide voers. dat Willem die Grebber Willem Cuser altoes pijnde te voldoen ende lief te doen als him dochte, ende dat hi niet en hoorde dat Willem die Cuser Willem die Grebber ondancte in desen stucken. Item seide heer Coen Cuser dat Willem die Grebber quam tot Willem Cuser sinen zoon, daer hi sat opten put voer t huijs voers, ende seide dat hi Willem Cuser spreecken woude. Daer seide hi Willem Cuser dt hi wel voeren him sien soude, hi duchte datter luden waren die him slaen wouden. Ende dat Willem die Grebber nauwe van Willem Cuser gesceiden was, daer en quamen luden lopen op Willem Cuser daer hi sat, ende vochten op him ende sloegen t naeste huijs duer, ende vreesden Willem seer ende sijn vrienden, ende voer dat huijs wort een van Willems Cusers knechten seer gewont. Ende heer Coen seide mede dat Willem die Grebber Willem Cusers maech was. item op tieselve tijt seide groote Pieter dat hi Willem Cuser hadde horen seggen dat hi Willem die Grebber bedancte, ende hadde hi gedaen, het soude him sijn lijf gecost hebben in den vechtelic tot Haerlem