1476-01-18 |

G.A. Monnikendam Inv 154 fol 8/Diversorium Galileaconvent

Jaartallenindex

op St Priscaesdach. Kont ende kenlic si allen denghenen die desen serter sullen sien of horen lesen, dat broeder Lubbert nu ter tijt keller van den convente van Galileen, mit broeder Jan Pilgramsz desselfdes convents van des cloester weghen voers, an den enen zijde. Ende Claes Vrericksz, sijn soen Melijs Claesz, ende Maerten Willemsz an den anderen zijde over hoer ende voer hoer nacomelinghen hebben tesamen eendrachteliken ghegrondeelt ten ewighen daghe duerende Claes Vrericsz weer, gheleghen in Katwoud, in teghenwoerdicheijt ende bewisen van Jan Florisz, Herman Jansz als een voecht van heer Jacob Proeijs, Lambert Jansz ende Gheryt Garbrantsz als sevenen ende naeste lendenen van den lendenen van den lande voers. Ende oec mede veelre ander goede mannen als heer Ysbrant Hilbrantsz, priester, Ruumstal, Jan Claesz die waert ende Adam Jacopsz als tughen hiertoe gheroepen ende ghenoet. Alsoe te verstaen dat dat convent etc sal hebben alsoe alst hem mitten lot ghevallen is die twie middelste stucken van dat weer voersz, ende Claes Vredericsz, Melys Claesz ende Maerten Willemsz voers. tesamen dat voetstucke ende dat after stucke van den weer voers. tot enen vrien eyghendom. Alle d..... sonder arch ende list. In kennisse der waerheyt der voers. delinghe sijn hiervan ghemaect twie saerters alleens ludende ut malcanderen den uten anderen gesneden doer A.B.C.D.E.F. van welken een of heeft ontfanghen dat cloester voers ende d'ander Claes Vrericksz, Melis Claesz en Marten Willemsz tesamen, int jaer ons Heren 1476 op St Priscaesdach