1533 | Uitgeest

G.A. Haarlem Inv I no 1633/Cartul H. Geest Haarlem fol 71, 72

Jaartallenindex

grondeeling van Lublincxweer en Mathijs Luytkens Ven (zie 1460-02-28, 1460): Memoriye van dese 2 perceelen an landen welcke in den jare 1553 ghegrondeelt ende bij lotinge ontfangen is over t quartier van een stuck lants den H. Geest toebehoorende, streckende van Hemsloot mit een oterdijck in de Cromme Ye, daervan Vrederick Gherritsz ende Dirrick Jacobsz tesamen elcke ghelijcke veel behoorde als die ¾ van 't eene stuck, t'ander leijt alleen op hem zelven. Eerst is te weten dat die voorn. Vrederick zijne helft van die ¾ is anghedeelt, te weten int binnenlant gheleghen tussen die Nessloot en die wech an die zuidzijde van t voors. lant mit enen rechten sloot duerghaende van den een eynde tot den anderen ende in die oterdijck mede an die zelve zuytzyde mit een rechten sloot diewelcke één voet meerder int noirden leijt dan de voors. sloot van t binnenlant, welcke slooten al ghemaect zijn over beijde zijden halff ende halff. Ende alzoe nae die ofdelinghe van de voirs. Vrederick in die reste of overghebleven lant den voirn. Dirrick Jacobsz doe meer behoorde dan den H. Geesthuys's vijfde deel, twelck hij ontfanghen moste vuyt t mistelde [?] van t lant dat arger ende snoder was dan die eynden, worde hem daerom toeghevonden dat hij voor die schade vooruijt soude hebben ende ghenieten in die oterdyck die brede van 3 roeden ende een voet, beginnende van die rechte royinghe van der Noordersloot van t voors. binnenlant oestwaert an soe verre die roeden strecken moghen. Ende dit al streckende van de voors. wech tot in de Cormmenije. Ende is nae die ofdelinghe van die voors. Vrederick ende die voors. voldoeninge van Dirrick Jacopsz die reste van 't lant noch groot bevonden te weten t binnenlant 2054 roeden ende die oterdyck 91 roeden, daerinne die H. Geest behoorde 858 roeden ende Dirrick Jacopsz 1287 roeden, daervan den H. Gheest ghevallen is bij lotinghe an den ooterdyck groot 91 roeden als voorn. ende an de binne weijde op t oosteijnde te weten an den wech 767 roeden. ende is Dirrick zynen porthy ende dele ghevallen ant Westeynde, dats an die Nessloot. Mit sulcker conditien ende voorsproocken voorwaerden dat de H. Gheest mit hueren lant eenen vrijen notwech zullen hebben over t lant van Dirrik tot op tie Nessloot. Dirrick wederom sal enen vrijen notwech over t lant van de H. Geest tot op de Crommenije hebben. Item is 't binnelant daeran den H. Geest ghevallen is breedt opt oosteynde 14 roeden 6 voet ende opt westeynde 14 roeden 11½ voet, daerinne dat ghemeten zijn die halve slooten ende is t selve lanck in zijne middel van den oostesloot tot int middel van die Scheijsloot tegens Dirrik 54 roeden 8 voet. Ende dese roeden zijn al Uytgheester roeden die ghehouden werden IIIId LXXX in een margen, ende 16 voeten in een roede. Item indien tot eenigen tijden die H. Geestmeesters den oterdyck vermangelden, zulcx dat zij van Dirk int binnelant vercreghen 2 ofte 3 roe voor een, of dat zij die eenichszins anders vervreemden, is hem luijden van groten node bedonghen in diezelve oterdyck eenen groten notsloot, daer men ghemacklick alsulcxs in mach varen, mit die alder grooste ghelaen hoyschuijt off een iver dat die overzijde mach legghen ende draijen an die voirs. binnenwech te dien eynde dat het huijs selfs te water t hoij zullen mogen thuijs halen, ende oock mede voor die Crommenierdyckers die anders t voors. lant niet en zoude mogen ghebruycken