1467-1575 (5) |

A.R.A. Familieregister van Spaernwoude (voorlopig) Charterdoos Fack VII van het Familiearchief Heereman van Zuydtwijck

Haarlem Algemeen

(vervolg) (fol 12) XIIIIc int jaer (14)89 des Saterdages voir die 10m martelarendach starft myn moije van Ruijven te Leijden int cloester tot Roem op Rapenburch. Item des Manendages voir St Marie Magdalenendach soe toegen wij tot Leyden om te bezien hoe t daer stont mit die erfnisse van onse moije ende daer vonden wij dat si al hoir tilbaer have ende al hoir guet utgesceiden ½ die Nesse had si het cloester gemaect aldaer. So en cregen wij niet dan ½ die Nesse, 7 sitkussen, een Marienbeeld en 6 R gld. Hiermede sijn wij van der erfnis gesceiden; (fol 12) int jaer ons Heren 1472 opten 24dach in Maert starf mijn moije van Woude. Int jaer ons Heren 1482 des Vridages voir Meij starf Eems Jan Claeszdochter, 1475 opten anderen dach in Augustus starf mijn moeder te Zijl binnen Haerlem; int jaer ons Heren: 1483 opten 9e dach in April starf Ysbrant Gerijtsz, mijn bastert broeder, 1488 omtrent Lucasmarct starf onse moeije van der Does, 1489 omtrent S. Michiel doe bleef te Enchusen Frans van Poelenburch, 1490 op St Bavendach starf Adriaen van Poelenburch; (fol 13) in t jaer 1484 op St Lambertsdach wart Geryt mijn bastertzoen geboren, 1486 op St Anthonisavont doe wart Willem mijn bastertzoen geboren. Item dese 2 kinderen storven int jaer 1486, den outsten 14 dagen voir den joncsten ende si worden beide in die Grote Kerk gegraven bij scepemakersoutaer in myn oudemoedersgraf. Item in tjaer 1491 opten lesten dach in Mey starf Adriaen myn soen, ende hij wart begraven in die Grote Kerk by die noerddoer onder enen roden sarck an een outer van Sinte Annen. Item int jaer 1472 starf myn moije van Haestrecht op ten 27e April. Int jaer 1459 des DIngsdages na Meydach starf Lysbeth Jan Claesdochter; (fol 13v) int jaer ons Heren: 1449 opten 7e dach in Augustus doe wort Marrie mijn suster doechdelic ontfangen int cloester ter Wyc, in 1471 des dages na der Apostelensceidinge starf Marrie myn suster, priorinne in die Wyc, des nachts te twee uren ende dit was op S Alexidach, in 1492 opten 10e dach in April starf heer Willem van Spaerwoude, priester, myn broeder, ende was op een Dinxdach savens voir Palmen, in 1494 opten 6e dach in April starf Jacop van Poelenburch mijn wijfs vader te Purmer int lant, ende wart te Hairlem gebrocht ende wort in die Grote Kerk begraven onder enen roden sarck an Sint Annen outaer