1503-10-20 |

G.A. Monnikendam Inv 154 fol 27/Diversorium Galileaconvent Monnikendam

Jaartallenindex

ic Gysbert van Duvoerde alias van Yselsteijn doe kont alle luyde dat voer my ende myne leenmannen ghecomen is heer Claes Claesz, priester, mit een brief, diewelke houdende is dat sijn moeder hem hevet overghegheven alsulke leen als si van mij houdende is bij twee leenmannen als Joest Jansz ende Jan Claesz, leene man van die graeflicheit van Hollant. Om die outheit willen dat si niet reysen en mach, ende is ghenaemt Katherijn Claes Evets wedue mit haren rechte ghecoren voecht als Mathys Jansz. Ende overmits des ghebede van goede mannen soe heb ic Gysbert van Duvoerde hem ghegunt ende ghegheven tot enen vrien wille ende enen vrien eyghendoem. Des soe hevet my heer Claes Claesz mit sijn ghecoren voecht als Gerijts Bartz my ende minen nacomelinghen opghedraghen twee deympte lants legghende int gerecht van Katwoude leggende ghemeen mit Jan Claesz noertwart van Claes te leghen hofstede. Belend oost: Claes Jan Hannetgen, west: Jan Reijersz ende Jan Volkentz. Tot een onversterfelijk leen, heergewade: een guede snoeck of een gulden daervoer. Hulde doet Geryt Bertz. Hier hevet bi an ende over gheweest als mijn leenmannen Claes Gysbertsz ende Gelys Meijnertsz. Vidimus van 1504-02-16 (vgl 1503-11-23)